Føremålet med verktøyet er å gi karriererettleiarar/utdannings- og yrkesrådgivarar i skulen eit høve til å få oversikt over sin eigen kompetanse, skape eit grunnlag for refleksjon, inspirere og gi retning til vidare fagleg utvikling.
– Som eit ledd i Fullføringsreformen for vidaregåande skole fekk vi eigne kompetansestandardar for karriererettleiing i skolen, fortel avdelingsleiar i Direktoratet for høgare utdanning og kompetanse, Ingjerd Espolin Gaarder.
– No følgjer HK-dir opp med ein eigen skoleversjon av verktøyet Min kompetanse, som er bygd på desse standardane. Vi vil gjere det enkelt for fagpersonar og profesjonsfellesskap å jobbe med kompetanseutvikling i karriererettleiing.
To versjonar
Sjølvevalueringsverktøyet er laga med utgangspunkt i kompetansestandardane for karriererettleiing i Nasjonalt kvalitetsrammeverk for karriererettleiing, og finst altså no i to versjonar: ein tverrsektoriell versjon og ein skuleversjon.
Den tverrsektorielle er utvikla med utgangspunkt i dei tverrsektorielle kompetansestandardane for karriererettleiing, medan skuleversjonen av verktøyet er utvikla med utgangspunkt i kompetansestandardane kor karriererettleiaren i skulen. Skuleversjonen finst på begge målformene.
Ein sjølvevaluering, ikkje ein test
Skuleversjonen av verktøyet er bygd opp rundt dei sju kompetanseområda. Innanfor kvart kompetanseområde tek karriererettleiaren stilling til 6–10 påstandar, og vel det svaralternativet som beskriv kompetansen best. Ei samla oversikt viser til slutt kva ein etter eiga vurdering er god på, og kva ein må jobbe vidare med.
Karriererettleiaren kan bruke verktøyet anonymt eller ved å logge inn. Når ein loggar inn, vil resultata bli lagra, og ein kan evaluere seg sjølv og kompetansen sin fleire gongar over tid, og følgje si eiga utvikling. Det er viktig å hugse på at dette er ei sjølvevaluering, ikkje ein test. Det er opplevinga til den einskilde av kva nivå ein sjølv meiner ein er på, som blir vist.
Tips til ressursar og vidareutvikling
Til kvar påstand finst ein kommentar som definerer omgrep, eller som utdjupar innhaldet i påstanden. I tillegg er det tips til ressursar; som filmsnuttar, verktøy, modellar, fagstoff, aktuelle nettsider etc. Dei som har brukartesta verktøyet, opplever at tipsa er svært nyttige og gir inspirasjon til å reflektere over og jobbe vidare med eigen kompetanse. Tipsa er òg spesielt nyttige for dei karriererettleiarane som er nye i jobben, og som ikkje kjenner rettleiingsfeltet så godt.
I verktøyet kan karriererettleiar òg notere ned tankar og refleksjonar til kvart enkelt kompetanseområde. Dette gjer det mogeleg for karriererettleiarane å følgje si eiga utvikling.
– Verktøyet skal støtte karriererettleiarane i å kartleggje, reflektere over og utvikle eigen kompetanse. Verktøyet kan brukast aleine eller saman med kollegaer, anten på eigen skule eller i regionale rådgjevarnettverk, seier Espolin Gaarder.
–Vi håpar mange vil ta det i bruk som utgangspunkt for samtalar om kompetanse og for vidare kompetanseutvikling!
Utforsk verktøyet her: Min kompetanse - Skole
Skriv ut
