Styrkebasert rettleiing i regionalt samarbeid

Alver kommune var partnar i RIGHT, og hadde ansvar for pilotprosjektet RIGHT Mongstad. Karriere Vestland gjennomførte styrkebasert rettleiing som ein del av oppfølginga av resultata frå kompetansekartlegginga, som er gjennomført av CXS Nordic. Resultata frå kartlegginga synte mellom anna at innovasjonsgraden var generelt høgare blant tilsette enn blant leiarar i eit utval av åtte industriverksemder på Mongstad.

Føremålet med RIGHT Mongstad

Pilotprosjektet RIGHT Mongstad hadde som overordna målsetting å kartlegge endringsviljen og innovasjonsgraden i leiinga og blant tilsette i utvalde verksemder på Mongstad.

Føremålet var å skape tryggleik, føreseielegheit og oppleving av påverknad og ansvar for eigen arbeidskarriere i ein overgangsfase som kan opplevast som krevjande og uoversiktleg i åra som kjem. Karriere Vestland gjennomførte styrkebasert rettleiing i Fase 2 av dette pilotprosjektet for å bidra til dette føremålet. Prosjektet vart avslutta i juni 2023.

Hovedfunn frå pilotprosjektet

Kompetansekartlegginga var gjennomført i det digitale kartleggingsverktøyet Inflow24 blant tilsette og leiarar i åtte utvalde industriverksemder, og det var utforma ein rapport på aggregert nivå av CXS Nordic. Kartlegginga tok utgangspunkt i personlege styrkar og preferansar, altså personlege eigenskaper. Saman med rettleiarar frå Karrieresenteret fekk dei tilsette høve til å gjennomgå individuell rettleiing med mål om djupare bevisstgjering av personlege styrkar for å stå betre rusta i endringsprosessar mot eit grønare skifte.

Hovedfunna frå pilotprosjektet viste at innovasjonsgraden var høgare hjå medarbeidarane enn blant leiarane for utvalet av industriverksemdene på Mongstad. Analysen synte også på generelt nivå at leiinga i desse verksemdene vil ha behov for å styrkje kompetansen i roller som «Visjonær» og «Forskar» for å kunne møte omstillings- og innovasjonsbehov betre i møtet med det grøne skiftet. Typiske personlege eigenskapar for desse rollene er nytenkjande og analytisk.

Pilotverksemdene skårar høgt på interesseområda Føretaksam, Praktisk, Sosial og Orden, som indikerar at dei tilsette verdset høg medverknad, utfordringar og utviklingsmoglegheiter, tydeleg leiing, kommunikasjon og samarbeid, og dessutan kontroll og føreseielegheit.

Analysen viser at for at Mongstad-regionen skal lykkast med den grøne omstillinga, krev moglegheitene og evna deira til å hente ut det eksisterande potensialet for kompetanse, innovasjon og endringsvilje, ein medarbeidarskap med større grad av medverknad, utfordringar og utviklingsmoglegheiter og kommunikasjon gjennom tydeleg leiing.   

Samarbeidspartnarar i Fase 2

Alver kommune var prosjekteigar, med ansvar for søknaden til Fase 2-prosjektet, og dessutan ansvar for oppfølging og forankring av prosjektet i verksemdene og sluttføring av rapportering. I forkant av Karriere Vestland si rettleiing gjennomførte CXS Nordic leiarutviklingsprogrammet basert på «Talent Management». Avslutningsvis vart UConsulting påkobla eit to-dagars innovasjonsleiarkurs for leiargruppene i begge verksemdene.

Karriere Vestland gjennomførte individuell rettleiing for å forankre resultata, og fekk tilgang til verksemdene sin HR-portal i Inflow24. Leiarane og tilsette hadde tilgang til si eiga kartlegging digitalt. I forkant blei det gjennomført informasjonsmøte i begge verksemdene, og dei to ansvarlege rettleiarane i Karriere Vestland gjennomført kursing i regi av CXS Nordic som førebuing til rettleiinga.

Styrkebasert rettleiing

Karriere Vestland gjennomførte rettleiinga, først blant leiarane som hadde gjennomført talentutviklingsprogrammet, og deretter på medarbeidernivå. 100 av dei 112 tilsette som hadde meldt si interesse i to utvalde industriverksemder, møtte opp til rettleiing, med inntil 1,5 time til disposisjon kvar.

På førehand gjennomførte dei to rettleiarane i Karriere Vestland som var ansvarlege for rettleiinga i verksemdene, ei kompetanseheving med følgjande kurs frå CXS Nordic AS.

1. Advanced Inflow24. Føremålet er å gå djupare inn i kvar enkelt modul av kartlegginga, og vurdere korrelasjonar mellom interesseprofil og preferanseprofil.
2. Decode Mongstad. Skreddarsydd kurs til prosjektet for å dekode stillingar med fokus på kompetanse og jobbmatch retta mot det grøne skiftet, med mål om å tryggje medarbeidarane, og få økt kunnskap om framtidig jobbmatch.

Rettleiinga for både leiarane og tilsette i verksemdene hadde fokus på Flow (god arbeidsflyt) og Flip (stresshandtering) i noverande stilling og i møte med endring, med utgangspunkt i interesser og preferansar. Det var også gjennomgang av ein GAP-analyse rundt livskvalitet, personlege eigenskaper, medverknad og kommunikasjon for bevisstgjering av eigne ressursar og sjølvleiing.

Innhald i rettleiinga

Kartlegginga i HR-portalen til verksemdene bestod av følgjande modular. Illustrasjonane er henta frå kartlegginga i Inflow24, og er anonymisert.

Interesseprofilen: Byggjer på RIASEC sin interesseprofil, med tilhøyrande grafisk beskriving av Flow (arbeidsflyt) og Flip (stress) for de tre største interessetypane. Interesseprofilen sine tre høgaste bokstavtypar syner medarbeidaren sin indre motivasjon for arbeidsoppgåver og kompetanseutvikling.

Figur.1 Døme på ein interesseprofil

Preferanseprofilen: Preferansane våre er baserte på korleis vi føretrekkjer å plassere oss langs fire aksar, med ein bokstavkombinasjon med preferansar som uttrykkjer eit livsmotto og ein personlegdom. Medarbeidaren sine personlege preferansar synleggjer kva for miljø medarbeidaren trivst best i, men også medarbeidaren sine styrkar og utviklingspotensial.

Figur 2. Døme på ein preferanseprofil

Teamrolle: I tillegg til preferanseprofilen vert også rolla medarbeidaren har i eit team, med kjenneteikn og bidrag i teamet, kartlagd. Dette kan nyttast til å setje saman team med komplimenterande roller for å utfylle styrkane til einannan.

Figur 3. Eksempel på ei teamrolle

Flow@work: Dette er eit sjølvhjelpsverktøy der du får synleggjort GAP mellom korleis du ønskjer å ha det, og korleis du faktisk har det nett no. Det er eit hjul som kan nyttast i medarbeidarsamtalar for å synleggjere kor energilekkasjen er. Når GAP er vist, som synt under her med kommunikasjon, er det viktig å ta fatt på det. Dei tilsette vert også meir medvitne på kva som er viktig. Når jobbverdiane til dei tilsette vert tekne vare på, vil den tilsette oppleve Flow. Å vere i Flow gjer den tilsette meir robust til å takle små og store endringar i livet.

Figur 4. Eksempel på flow@work

Bidrog til omstillingskompetanse

Karriere Vestland bidrog til omstillingskompetanse i verksemder med styrkebasert rettleiing i overgangen til nye moglegheiter i industrien, i regionalt samarbeid med andre profesjonelle aktørar. Karriere Vestland opplevde rettleiinga som ei takknemleg oppgåve frå Alver kommune, og følte seg varmt velkomne i verksemdene. Styrkebasert rettleiing bidreg til «empowerment» og robustheit i møtet med omstilling, og var i dette prosjektet ein viktig bindeledd i samarbeidet om talentutvikling og endringsleiing. Bevisstgjering av personlege styrkar er godt eigna til medarbeidarsamtalar og samansetting av team, og ikkje minst til å oppdage og ta godt vare på dei tilsette i verksemdene. CXS Nordic gjorde ei opplæring av leiarane i dette.

Det vart gjennomført eit evalueringsmøte med leiinga, og sendt ut eit evalueringsskjema blant tilsette med ein svarrespons på 24 prosent. Resultata stadfestar tilbakemeldingane vi fekk undervegs. Rettleiinga blei sett på som positiv og nyttig for bevisstgjering av personlege styrkar og motivasjon. Resultatet kan tyde på at fleirtalet også synest at rettleiinga gjorde dei enda meir medvitne om sin eigen kompetanse inn i det grøne skiftet. Tove Hagenes, som var prosjektleiar i Alver, stadfestar at leiarar og tilsette frå verksemdene har gitt svært gode tilbakemeldingar, og oppgir at dei nyttar kompetansepåfyllet i vidare drift.

Samarbeidet er eit døme på vidareføring av resultata frå eit stort og krevjande internasjonalt innovasjonsprosjekt, som viste kor viktig medarbeidarskap er for innovasjon. Karriere Vestland er saman med Hardangerrådet partnar i eit anna EU-prosjekt, det strategiske samarbeidsprosjektet Stride4Stride, der nettopp føremålet er å sjå korleis Karriere Vestland kan ha ei rolle inn i det regionale økosystemet for kompetanse.