Fafo har undersøkt korleis kurset Livsmeistring i eit nytt land blir gjennomført som ein del av introduksjonsprogrammet for nykomne flyktningar i kommunane (sjå faktaboks). Kurset inneheld to hovuddelar. Det eine temaet er Karrierekompetanse, og det andre er Migrasjon, helse og mangfald.
Ingjerd Espolin Gaarder, avdelingsdirektør i Avdeling for kvalitet i karriererettleiing i Direktoratet for høgare utdanning og kompetanse (HK-dir), er samd i det som kjem fram i rapporten om at kommunane og karrieresentera i fylkeskommunane har mykje å vinne på å samarbeide tettare.
–Når kommunen og fylkeskommunen samarbeider godt, kan dei nytte sine ulike roller og kompetanse til å skape ei meir samanhengande og heilskapleg oppfølging av deltakarane, seier Espolin Gaarder.
Stor variasjon – også i kompetanse
Fafo har kartlagt at det er stor variasjon mellom kommunane i korleis kurset i karrierekompetanse blir lagt opp, og kven som har ansvaret for det.
Karrierekompetanse blir definert som kompetanse til å kjenne og forstå seg sjølv og sin eigen kontekst, til å handle og ta val, og til å handtere dilemma og spenningar knytte til liv, læring og arbeid. Det inkluderer innsikt i at den enkelte blir forma av livsvilkåra og handlingane sine, men også kan påverke og forme si eiga og fellesskapet si framtid. (kjelde: Nasjonalt kvalitetsrammeverk for karriererettleiing)
I underkant av halvparten av kommunane svarar at dei ikkje samarbeider med karrieresenter eller dei som driv med kompetansekartlegging i kommunen. Det er også betydeleg variasjon i kompetansen til dei som underviser, i bruken av faglege opplegg og i korleis samarbeidet er organisert.
På spørsmål om kompetansen blant dei som er ansvarlege for å gjennomføre undervisninga i Karrierekompetanse, svarar ein fjerdedel at dei har delteke på kurs for grupperettleiarar i karrierekompetanse ved Universitetet i Søraust-Noreg (USN).
Fire av ti har gjennomført andre former for kompetanseheving innan karriererettleiing, og ein av ti har studiepoeng i karriererettleiing. Trass i krav i forskrifta opplyser 16 prosent at dei verken har rettleiings- eller undervisningskompetanse.
Karrierelæring er ein utviklingsprosess
I dag er det vanleg at undervisninga i dei 15 timane med karrierekompetanse blir gjennomført i løpet av ei veke. Fleire av rettleiarane, både i denne Fafo-studien og i tidlegare studiar, har samstundes uttrykt eit tydeleg ønske om å leggje rettleiinga meir opp som ein lengre prosess.
«Jeg er imot å ha livsmestring en sånn uke, fordi vår erfaring sier at dette er en prosess, det må høres, diskuteres og oppleves […]. Prosessen, det å bli kjent, bruke mye tid på å føle seg trygg, det er viktig», sa ein informant.
– Desse funna, som ein kan kjenne att frå andre undersøkingar, tyder på at det er gode faglege grunnar for å sjå nærare på korleis kommunane og karrieresentra kan samarbeide og utfylle kvarandre betre. Poenget er at karrierelæringa då kan bli ein utviklingsprosess som går føre seg gjennom heile introduksjonsprogrammet, og ikkje berre eit kurs som blir avslutta etter nokre timar. Fafo-rapporten viser at det i nesten halvparten av tilfella ikkje er noko samarbeid mellom kommunar og karrieresenter. Det er for lågt, meiner Espolin Gaarder.
Ho viser til at målet med karriererettleiinga gitt av fylkeskommunane, og kommunane sitt arbeid med karrierekompetanse, er det same: å gi flyktningar betre føresetnader for å ta gode val om utdanning, arbeid og framtid i eit nytt land.
– Når desse tilboda heng saman, kan vi skape ein tydelegare raud tråd i integreringsløpet og styrkje moglegheitene deltakarane har til varig deltaking i arbeids- og samfunnslivet.
Skriv ut
